Upplestrarfrí
Þá erum við bara komin í upplestrarfrí. Vika og einn dagur í eina prófið mitt og 6 dagar í Gummapróf. Það má því fastlega gera ráð fyrir að hér verði gert lítið annað en að lesa, sofa og éta á þessu heimili næstu 7 dagana.
Síðasta laugardag buðum við Birni, Val, Kidda og Sigurgeiri í lambalærið sem pabbi og mamma fluttu með sé hingað. Það bragðaðist sko aldeilis ekki illa. Samt svoltið fyndið hvað okkur finnst lambakjötið okkar gott. Þegar ég hitti ljósuna mína síðast þá var einmitt lambalærið (ásamt mömmu og pabba) að lenda í Stokkhólmi þannig að ég sagð henni að sjálfsögðu frá því að þau væru að koma í heimsókn og með þeim þessi ágæta löpp. Eina sem hún sagði var: "þegar maður er stúdent þá borðar maður hvað sem er" . Hún er greinilega ekki jafn hrifin af þessu kjöti eins og við :) Eftir matinn fórum við svo í ágætis afmælispartý til Ragga og Heiðrúnar.
Á sunnudeginum ákvað ég að kíkja á Betu í nýja húsnæðinu. Það er töluvert styttra að heimsækja þau á nýja staðinn, bara rétt rúmlega einn strætó. Ég endaði þar í bakstri, kvöldmat og svo hinu fínasta aðventukaffi með randalínu, heitu súkkulaði og íslenskum jólalögum.
Meira var það ekki í bili, kem kannski með nákvæmar lýsingar innihaldsríkum lærdómsdögum mínum hér einhvern tímann við tækifæri, kannski ekki.....bæ í bili.
Skrifað 8:04 e.h. af Sveinbjörgu
|